Eg eiti Ingun Christensen og eri uppvaksin í einum tveymálsligum heimi við føroyskari mammu og donskum pápa. Eg veit ikki, um tað er haðani áhugin fyri máli stavar. Men mær hevur altíð dámað væl mál og havi tikið útbúgving sum korrespondentur í enskum/týskum og víðari útbúgving sum BA (Bachelor of Modern Languages and Business Studies) og ED (Den Erhvervssproglige Diplomuddannelse) í enskum. Harafturat havi eg eisini lisið spanskt á grundstøði.
Bókmentir hava altíð havt ein stóran leiklut frá barni av, og eg havi altíð lisið nógv.
Eg gjørdi mína fyrstu yrking sum tólv ára gomul og setti lag til. Síðani tá havi eg skrivað fleiri sangir í familjuhøpi – eitt nú til brúdleyp, konfirmatión, føðingardagar o.a. So áhugin at skriva hevur altíð ligið og prutlað í mær onkursvegna. Tað er nakað dragandi og spennandi at sameina hugflog og orðaspæl í kreativari skriving – at fortelja eina søgu, har tú ert skaparin og til tíðir eisini áhoyrarin/lesarin, tá søgan fer avstað við tær.
Fyrstu ferð eg fekk nakað á prent var í blaðnum Kvinna í 2009, har eg skrivaði yrkingina “Trælabundin”. Síðan tá eru fleiri bøkur og stuttsøgur komnar út til bæði børn, ung og vaksin. Bøkurnar fevna um ævintýr, samtíðarbøkur, bøkur grundaðar á føroyskar sagnir og stuttsøgusavn.
Her kanst tú lesa meir um mínar útgávur: https://inguncblog.com/about/
IngunC 